8. Piṇḍasuttavaṇṇanā

[154] Aṭṭhame pāhunakāni bhavantīti tathārūpe nakkhatte tattha tattha pesetabbāni pahonakāni bhavanti. Āgantukapaṇṇākāradānāni vā. Sayaṃ caraṇadivaso kira so. Samavayajātigottā kumārakā tato tato sannipatanti. Kumārikāyopi attano attano vibhavānurūpena alaṅkatā tahaṃ tahaṃ vicaranti. Tatra kumārikāyopi yathārucitānaṃ kumārakānaṃ paṇṇākāraṃ pesenti, kumārakāpi kumārikānaṃ aññasmiṃ asati antamaso mālāgulenapi parikkhipanti. Anvāviṭṭhāti anuāviṭṭhā. Taṃdivasaṃ kira pañcasatā kumārikāyo uyyānakīḷaṃ gacchantiyo paṭipathe satthāraṃ disvā mandapūvaṃ dadeyyuṃ, satthā tāsaṃ dānānumodanatthaṃ pakiṇṇakadhammadesanaṃ deseyya, desanāpariyosāne sabbāpi sotāpattiphale patiṭṭhaheyyuṃ, māro tāsaṃ sampattiyā antarāyaṃ karissāmīti anvāvisi. Pāliyaṃ pana mā samaṇo gotamo piṇḍamalatthāti. Ettakaṃyeva vuttanti.

Kiṃ pana satthā mārāvaṭṭanaṃ ajānitvā paviṭṭhoti. Āma ajānitvā. Kasmā? anāvajjanakatāya. Buddhānaṃ hi "asukaṭṭhāne bhattaṃ labhissāma, na Labhissāmā"ti āvajjanaṃ ananucchavikaṃ. Paviṭṭho pana manussānaṃ upacārabhedaṃ disvā "kiṃ idan"ti āvajjento ñatvā "āmisatthaṃ mārāvaṭṭanaṃ bhindituṃpi ananucchavikan"ti abhinditvāva nikkhanto.