5. Māradhītusuttavaṇṇanā

[161] Pañcame abhāsitvāti ettha akāro nipātamattaṃ, bhāsitvāti attho. Abhāsayitvātipi pāṭho. Upasaṅkamiṃsūti "gopāladārakaṃ viya daṇḍakena bhūmiyaṃ vilekhantaṃ disvā ativiya dummano hutvā nisinno, `kinnu kho kāraṇan'ti pucchitvā jānissāmā"ti upasaṅkamiṃsu.

Socasīti cintesi. Araññamiva kuñjaranti yathā araññato pesitagaṇikārahatthiniyo araññikaṃ kuñjaraṃ itthīkuttadassanena palobhetvā bandhitvā ānayanti, evaṃ ānayissāma. Māradheyyanti tebhūmikavaṭṭaṃ.

Upasaṅkamiṃsūti "tumhe thokaṃ adhivāsetha, mayaṃ taṃ ānessāmā"ti pitaraṃ samassāsetvā upasaṅkamiṃsu. Uccāvacāti nānāvidhā. Ekasataṃ ekasatanti ekekaṃ sataṃ sataṃ katvā. Kumārivaṇṇasatanti iminā nayena kumāriattabhāvānaṃ sataṃ.