2. Somāsuttavaṇṇanā

[163] Dutiye ṭhānanti arahattaṃ. Durabhisambhavanti duppasahaṃ. Dvaṅgulapaññāyāti parittapaññāya. Yasmā vā dvīhi aṅgulīhi kappāsavaṭṭiṃ gahetvā suttaṃ kantanti, tasmā itthī "dvaṅgulapaññā"ti vuccati. Ñāṇamhi vattamānamhīti phalasamāpattiñāṇe vattamāne. Sammā dhammaṃ vipassatoti catusaccadhammaṃ vipassantassa, pubbabhāge vā vipassanāya ārammaṇabhūtaṃ khandhapañcakameva. Kiñci vā pana asmīti aññaṃ vā kiñcanaṃ "ahaṃ asmī"ti taṇhāmānadiṭṭhivasena yassa siyā.

Dutiyaṃ.