3. Andhakavindasuttavaṇṇanā

[184] Tatiye andhakavindanti evaṃnāmakaṃ gāmaṃ. Upasaṅkamīti "satthā idānipi viriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ viriyapaṭisaṃyuttaṃ gāthaṃ vakkhāmī"ti upasaṅkami.

Pantānīti janataṃ atikkamitvā manussānaṃ anūpacāre ṭhitāni. Saññojanavippamokkhāti tāni ca senāsanāni sevamāno na cīvarādīnaṃ atthāya seveyya, athakho dasasaññojanavippamokkhatthāya careyya. Saṃghe vaseti tesu senāsanesu ratiṃ alabhanto upaṭṭhākādīnaṃ cittānurakkhanatthaṃ gadrabhapiṭṭhe rajaṃ viya uppatanto araññe avasitvā saṃghamajjhe vaseyya. Rakkhittato satimāti tattha ca vasanto sagavacaṇḍo goṇo viya sabrahmacārino avijjhanto aghaṭento rakkhitatto satipaṭṭhānaparāyano hutvā vaseyya.

Idāni saṃghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni sayanāsanānīti saṃghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsaneva vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.