8. Hirīsuttavaṇṇanā

[18] Aṭṭhame hirīnisedhoti hiriyā akusaladhamme nisedhetīti hirinisedho. Koci lokasmiṃ vijjatīti koci evarūpo vijjatīti pucchati. Yo nindaṃ apabodhetīti yo garahaṃ apaharanto bujjhati. Asso bhadrokasāmivāti yathā bhadro assājānīyo kasaṃ apaharanto bujjhati, paṭodacchāyaṃ disvā saṃvijjhanto viya kasāya attani pātaṃ na deti, evameva yo bhikkhu bhūtassa akkosavatthuno attani nipātaṃ adadanto nindaṃ apabodheti apaharanto bujjhati, evarūpo koci khīṇāsavo vijjatīti pucchati. Abhūtakkosena pana parimutto nāma natthi. Tanuyāti tanukā, hiriyā akusale dhamme nisedhetvā carantā khīṇāsavā nāma appakāti attho. Sadā satāti niccakālaṃ sativepullena samannāgatā. Antaṃ dukkhassa pappuyyāti vaṭṭadukkhassa koṭiantabhūtaṃ nibbānaṃ pāpuṇitvā. Sesaṃ vuttanayamevāti.

Hirīsuttavaṇṇanā niṭṭhitā.