6. Sāriputtasuttavaṇṇanā

[214] Chaṭṭhe poriyāti akkharapadaparipuṇṇāya. Vissaṭṭhāyāti avibaddhāya apalibaddhāya. Dhammasenāpatissa hi kathentassa pittādīnaṃ vasena apalibuddhaṃ vacanaṃ hoti, ayadaṇḍena pahatakaṃsatālato saddo viya niccharati. Anelagaḷāyāti anelāya agaḷāya niddosāya ceva agaḷita padabyañjanāya ca. Therassa hi kathayato padaṃ vā byañjanaṃ vā na parihāyati. Atthassa viññāpaniyāti atthassa viññāpanasamatthāya. Bhikkhunanti bhikkhūnaṃ.

Saṃkhittenapīti "cattārīmāni āvuso ariyasaccāni. Katamāni cattāri. Dukkhaṃ ariyasaccaṃ .pe. Imāni kho āvuso cattāri ariyasaccāni, tasmātihāvuso idaṃ dukkhaṃ ariyasaccanti yogo karaṇīyo"ti evaṃ saṃkhittenapi deseti. Vitthārenapīti "katamaṃ āvuso dukkhaṃ ariyasaccan"tiādinā nayena tāneva vibhajanto vitthārenapi