10. Yakkhasaṃyutta

10. Yakkhasaṃyutta

1. Indakasuttavaṇṇanā

[235] Yakkhasaṃyuttassa paṭhame indakassāti indakūṭanivāsino yakkhassa. Yakkhato hi kūṭena, kūṭato ca yakkhena nāmaṃ laddhaṃ. Rūpaṃ na jīvanti vadantīti yadi buddhā rūpaṃ jīvanti na vadanti, yadi rūpaṃ satto puggaloti evaṃ na vadantīti attho. Kathaṃ nvayanti kathaṃ nu ayaṃ. Kutassa aṭṭhīyakapiṇḍametīti assa sattassa aṭṭhī yakapiṇḍañca kuto āgacchati. Ettha ca aṭṭhiggahaṇena tīṇi aṭṭhisatāni, yakapiṇḍaggahaṇena nava maṃsapesisatāni gahitāni. Yadi rūpaṃ na jīvo, athassa imāni ca aṭṭhīni imā ca maṃsapesiyo kuto āgacchantīti pucchati. Kathaṃ nvayaṃ sajjati gabbhasminti kena nu kāraṇena ayaṃ satto mātu kucchismiṃ sajjati laggati nibbattati. Puggalavādī kiresa yakkho, "ekappahāreneva satto mātu kucchismiṃ nibbattatī"ti gahetvā gabbhaseyyakasattassa mātā macchamaṃsādīni khādati, sabbāni ekarattivāsena pacitvā pheṇuṃ viya vilīyanti. Yadi rūpaṃ satto na bhaveyya, evameva vilīyeyyāti laddhiyā evamāha. Athassa bhagavā "na mātu kucchismiṃ ekappahāreneva nibbattati, anupubbena pana vaḍḍhatī"ti dassento paṭhamaṃ kalalaṃ hotītiādimāha. Tattha paṭhamanti paṭhamena paṭisandhiviññāṇena saddhiṃ tissoti vā pussoti vā nāmaṃ natthi. Athakho tīhi jātiuṇṇaṃsūhi katasuttagge saṇṭhitatelabinduppamāṇaṃ kalalaṃ hotīti, yaṃ sandhāya vuttaṃ:-