9. Āraññakasuttavaṇṇanā

[255] Navame paṇṇakuṭīsu sammantīti himavantapadese ramaṇīye araññāyatane rattiṭṭhānadivāṭṭhānacaṅkamanādīhi sampannāsu paṇṇasālāsu vasanti. Sakko ca devānamindo vepacitti cāti ime dve janā jāmātikasassurā kālena kalahaṃ karonti, kālena ekato caranti, imasmiṃ pana kāle ekato cariṃsu. Aṭaliyoti gaṇaṅgaṇupāhanā. Khaggaṃ olaggetvāti khaggaṃ aṃse olaggetvā. Chattenāti dibbasetacchattena matthake dhārayamānena. Apabyāmato karitvāti byāmato akatvā. Ciradakkhitānanti cirasamādinnavattānaṃ. Ito paṭikkamāti "ito pakkama parivajjaya, mā uparivāte tiṭṭhā"ti vadanti. Na hettha devāti etasmiṃ sīlavantānaṃ gandhe devā na paṭikkūlasaññino, iṭṭhakantamanāpasaññinoyeva panāti dīpeti. Navamaṃ.

@2 cha.Ma. nipphannasobhano atthoti 3 cha.Ma. araññāyatanaisisuttavaṇṇanā