10. Eṇijaṅghasuttavaṇṇanā

[30] Dasame eṇijaṅghanti eṇimigassa viya suvaṭṭitajaṅghaṃ. Kisanti athūlaṃ samasarīraṃ. Athavā tacomilātaṃ mālāgandhavilepanehi anūpabrūhitasarīrantipi attho. Vīranti viriyavantaṃ. Appāhāranti bhojane mattaññutāya mitāhāraṃ, vikālabhojanaṃ paṭikkhepavasena vā parittāhāraṃ. Aloluppanti catūsu paccayesu loluppavirahitaṃ. Rasataṇhāpaṭikkhepo vā esa. Sīhaṃvekacaraṃ nāganti ekacaraṃ sīhaṃ viya, ekacaraṃ nāgaṃ viya. Gaṇavāsino hi pamattā honti, ekacarā appamattā, tasmā ekacarāva gahitā. Paveditāti pakāsitā kathitā. Etthāti etasmiṃ nāmarūpe. Pañcakāmaguṇavasena hi rūpaṃ gahitaṃ, manena nāmaṃ, ubhayehi pana avinibhuttadhamme gahetvā pañcakkhandhādivasena pettha bhummaṃ yojetabbanti. Dasamaṃ.

Sattivaggo tatiyo.