4. Satullapakāyikavagga

1. Sabbhisuttavaṇṇanā

[31] Satullapakāyikavaggassa paṭhame satullapakāyikāti sataṃ dhammasamādānavasena ullapitvā sagge nibbattāti satullapakāyikā. Tatridaṃ vatthuṃ:- sambahulā kira samuddavāṇijā nāvāya samuddaṃ pakkhandiṃsu. Tesaṃ khittasaravegena gacchantiyā nāvāya sattame divase samuddamajjhe mahantaṃ uppātikaṃ pātubhūtaṃ, mahāummiyo uṭṭhahitvā nāvaṃ udakassa pūrenti. Nāvāya nimmujjamānāya mahājano attano attano devatānaṃ nāmāni gahetvā āyācanādīni karonto paridevi. Tesaṃ majjhe eko puriso "atthi nu no me evarūpe bhaye patiṭṭhā"ti āvajjento attano parisuddhāni saraṇāni ceva sīlāni ca disvā yogī viya pallaṅkaṃ ābhujitvā nisīdi. Tametaṃ itare abhayakāraṇaṃ pucchiṃsu. So tesaṃ kathesi "āma bho ahaṃ nāvaṃ abhiruhanadivaseva bhikkhusaṃghassa dānaṃ datvā saraṇāni ceva sīlāni ca aggahesiṃ, tena me bhayaṃ natthī"ti. Kiṃ pana sāmi etāni aññesaṃpi vaṭṭantīti. Āma vaṭṭantīti. Tenahi amhākaṃpi dethāti. So te manusse sataṃ sataṃ katvā satta koṭṭhāse akāsi, tato pañca sīlāni adāsi. tesu paṭhamaṃ janasataṃ gopphakamatte udake ṭhitaṃ aggahesi, dutiyaṃ jānumatte, tatiyaṃ kaṭimatte, catutthaṃ nābhimatte, pañcamaṃ thanamatte, chaṭṭhaṃ galappamāṇe, sattamaṃ mukhena loṇodake pavisante aggahesi. So tesaṃ sīlāni datvā "aññaṃ tumhākaṃ paṭisaraṇaṃ natthi, sīlameva āvajjethā"ti ugghosesi. Tāni sattapi satāni tattha kālaṃ katvā āsannakāle gahitasīlaṃ nissāya tāvatiṃsabhavane nibbattiṃsu, tesaṃ ghaṭāvaseneva vimāni nibbattiṃsu. Sabbamajjhe ācariyassa yojanasatikaṃ suvaṇṇavimānaṃ nibbatti, avasesāni tassa parivārāni hutvā sabbaheṭṭhimaṃ dvādasayojanikaṃ ahosi. Te nibbattakkhaṇeyeva kammaṃ āvajjentā ācariyaṃ nissāya taṃ sampattilābhaṃ ñatvā "gacchāma tāva,