3. Sādhusuttavaṇṇanā

[33] Tatiye udānaṃ udānesīti udāhāraṃ udāhari. Yathā hi yaṃ telaṃ pamāṇaṃ gahetuṃ na sakkoti visanditvā gacchati, taṃ avasesakoti vuccati. Yaṃ ca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati, evameva yaṃ pītivacanaṃ dahayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati, evarūpaṃ pītimayavacanaṃ nicchāresīti attho. Saddhāyapi sāhu dānanti kammañca kammaphalañca saddahitvāpi dinnadānaṃ sāhu laddhakaṃ bhaddakameva. Āhūti kathenti. Kathaṃ panetaṃ ubhayaṃ samaṃ nāma hotīti? jīvitabhīruko hi yujjhituṃ na sakkoti, khayabhīruko dātuṃ na sakkoti. "jīvitaṃ ca rakkhissāmi yujjhissāmi cā"ti hi vadanto na yujjhati. Jīvate pana ālayaṃ vissajjetvā chejjaṃ vā hotu maraṇaṃ vā, gamissāmetaṃ issariyan"ti ussahantova yujjhati. "bhoge ca rakkhissāmi, dānaṃ ca dassāmī"ti vadanto na dadāti. Bhogesu pana ālayaṃ vissajjetvā mahādānaṃ dassāmīti ussahantova deti. Evaṃpi dānañca yuddhañca samaṃ hoti. Kiñci bhiyyo:- appāpi santā bahuke jinantīti yathā ca yuddhe appāpi vīrapurisā bahuke bhīrukapurise jinanti, evaṃ saddhādisampanno appakaṃpi dānaṃ dadanto bahumaccheraṃ maddati, bahuñca dānavipākaṃ adhigacchati. Evaṃpi dānaṃ ca yuddhaṃ ca samānaṃ. Tenevāha:-

"appaṃpi ce saddahāno dadāti

teneva so hoti sukhī paratthā"ti.