8. Sakalikasuttavaṇṇanā

[38] Aṭṭhame maddakucchisminti evaṃnāmake uyyāne. Taṃ hi ajātasattumhi kucchigate tassa mātarā "ayaṃ mayhaṃ kucchigato gabbho rañño sattu bhavissati, kimme iminā"ti gabbhapātanatthaṃ tattha kucchi maddāpitā. Tasmā "maddakucchī"ti saṅkhaṃ gataṃ. Migānaṃ pana abhayavāsatthāya dinnattā migadāyo vuccati.

Tena kho pana samayenāti ettha ayaṃ anupubbīkathā:- devadatto hi ajātasattuṃ nissāya dhanuggahe ca dhanapālakaṃ ca payojetvāpi tathāgatassa jīvitantarāyaṃ kātuṃ asakkonto "sahatthāva naṃ māressāmī"ti gijjhakūṭaṃ pabbataṃ abhirūhitvā mahantaṃ kūṭāgārappamāṇaṃ silaṃ ukkhipitvā "samaṇo gotamo