9. Paṭhamapajjunnadhītusuttavaṇṇanā

[39] Navame pajjunnassa dhītāti pajjunnassa nāma vassavalāhakadevarañño cātummahārājikassa dhītā. Abhivandeti bhagavā tumhākaṃ pāde vandāmi. Cakkhumatāti pañcahi cakkhūhi cakkhumantena tathāgatena. Dhammo anubuddhoti "idaṃ mayā pubbe paresaṃ santike kevalaṃ sutaṃyeva asī"ti vadati. Sāhaṃdānīti sā ahaṃ idāni. Sakkhi jānāmīti paṭivedhavasena paccakkhameva jānāmi. Vigarahantāti "hīnakkharapadabyañjano"ti vā "aniyyāniko"ti vā evaṃ garahantā. Roruvanti dve roruvā dhūmaroruvo ca jālaroruvo ca. Tattha dhūmaroruvo visuṃ hoti, jālaroruvoti pana avīcimahānirayassevetaṃ nāmaṃ. Tattha hi sattā aggimhi jalante jalante punappunaṃ ravaṃ ravanti, tasmā so "roruvo"ti vuccati. Ghoranti dāruṇaṃ. Khantiyā upasamena upetāti rucitvā khametvā gahaṇakhantiyā ca rāgādiupasamena ca upetāti. Navamaṃ.