8. Uppathasuttavaṇṇanā

[58] Aṭṭhame rāgo uppathoti sugatiñca nibbānañca gacchantassa amaggo. Rattidivakkhayo rattīhi divehi ca khīyati. Itthīmalanti sesaṃ bāhiramalaṃ osaṅkhārādīhi dhovitvā sakkā sodhetuṃ, mātugāmamalena phuṭṭho pana na sakkā suddho nāma kātunti itthī "malan"ti vuttā. Etthāti ettha itthiyaṃ pajā sajjati. Tapoti indriyasaṃvaradhutaṅgaguṇaviriyadukkarakārikānaṃ nāmaṃ, idha pana ṭhapetvā dukkarakārikaṃ sabbāpi kilesasantāpikā paṭipadā vaṭṭati. Brahmacariyanti methunavirati.

Aṭṭhamaṃ.