5. Bhītāsuttavaṇṇanā

[75] Pañcame kiṃsūdha bhītāti kiṃ bhītā. Maggo canekāyatanaṃ pavuttoti aṭṭhatiṃsārammaṇavasena anekehi kāraṇehi kathito. Evaṃ sante kissa bhītā hutvā ayaṃ janatā dvāsaṭṭhī diṭṭhiyo aggahesīti vadati. Bhūripaññāti bahupaññā ussannapaññā. Paralokaṃ na bhāyeti imasmā lokā paralokaṃ gacchanto na bhāyeyya. Paṇidhāyāti ṭhapetvā. Bahuannapānaṃ gharamāvasantoti anāthapiṇḍikādayo viya bahunnapāne ghare vasanto. Saṃvibhāgīti accharāya gahitaṃpi nakhena phāletvā parassa datvāva bhuñjanasīlo. Vadaññūti vuttamatthameva.

Idāni gāthāya aṅgāni uddharitvā dassetabbāni. "vācan"ti hi iminā cattāri sucaritāni gahitāni, "manenā"ti padena tīṇi manosucaritāni, "kāyenā"ti