6. Najīratisuttavaṇṇanā

[76] Chaṭṭhe nāmagottaṃ na jīratīti atītabuddhānaṃ yāvajjadivasā nāmagottaṃ kathiyati, tasmā na jīratīti vuccati. Porāṇā pana "addhāne gacchante na paññāyissati, jīraṇasabhāvaṃ pana na hotiyevā"ti vadanti. Ālasyanti ālasiyaṃ, yena ṭhitaṭṭhāne ṭhitova, nisinnaṭṭhāne nisinnova hoti, kesepi uttarante tinte na karoti. Pamādoti niddāya vā kilesavasena vā pamādo. Anuṭṭhānanti kammasamaye kammakaraṇaviriyābhāvo. Asaññamoti sīlasaññamābhāvo visaṭṭhācāratā. Niddāti soppabahulatāya gacchantopi ṭhitopi nisinnopi niddāyati, pageva nipanno. Tandīti aticchātādivasena āgantukālasiyaṃ. Te chiddeti tāni cha chiddāni cha vivārāni. Sabbasoti sabbākārena. Tanti nipātamattaṃ. Vivajjayeti vivajjeyya jaheyya. Chaṭṭhaṃ.

@4 Ma. porāṇanāmassa 5 cha.Ma., i. jīraṇasabhāvo