Imassa ca panatthassa pakāsanatthaṃ ekasāṭakabrāhmaṇavatthuṃ ca aṅkuravatthuṃ ca vitthāretabbaṃ.

Dhammaladdhassāti dhammena samena laddhassa bhogassa dhammaladdhassa ca puggalassa. Ettha puggalo laddhadhammo nāma adhigatadhammo ariyapuggalo. Iti yaṃ dhammaladdhassa bhogassa dānaṃ dhammaladdhassa ariyapuggalassa dīyati, taṃpi sādhūti attho. Yo dhammaladdhassāti imasmiṃpi gāthāpade ayameva attho. Uṭṭhānaviriyādhigatassāti

Vetaraṇinti desanāsīsamattamevetaṃ. Yamassa pana vetaraṇimpi sañjīvakāḷasuttādayopi ekatiṃsa mahānirayepi sabbasova atikkamitvāti attho.

Viceyya dānanti vicinitvā dinnadānaṃ. Tattha dve vicinanā dakkhiṇāvicinanaṃ ca dakkhiṇeyyavicinanaṃ ca. Tesu lāmakalāmake paccaye apanetvā paṇītapaṇīte vicinitvā tesaṃ dānaṃ dakkhiṇāvicinanaṃ nāma. Vipannasīle ito bahiddhā chanavuti pāsaṇḍabhede vā dakkhiṇeyyaṃ pahāya sīlādiguṇasampannānaṃ sāsane pabbajitānaṃ dānaṃ dakkhiṇeyyavicinanaṃ nāma. Evaṃ dvīhākārehi viceyya dānaṃ. Sugatappasaṭṭhanti sugatena vaṇṇitaṃ. Tattha dakkhiṇeyyavicinanaṃ dassento ye dakkhiṇeyyātiādimāha. Vījāni vuttāni yathāti iminā pana dakkhirāvicinanaṃ āha. Avicinabījasadisā hi vicinitvā gahitā paṇītapaṇītā deyyadhammāti.