@4 cha.Ma. vañcetvā vāti. Paṇḍitā jānanti. Iti tā devatā "tathāgatāpi mayameva paṇḍitā"ti maññamānā evamāhaṃsu.

Atha bhagavā na yidantiādimāha. Tattha yāyaṃ paṭipadā daḷhāti ayaṃ dhammānudhammapaṭipadā hi thiRā. Yāya paṭipadāya dhīrā paṇḍitā ārammaṇūpanijjhānena lakkhaṇūpanijjhānena cāti dvīhi jhānehi jhāyino mārabandhanā pamuccanti, taṃ paṭipadaṃ bhāsitamattena vā savanamattena vā okkamituṃ paṭipajjituṃ na sakkāti attho. Na ve dhīrā pakubbantīti dhīrā paṇḍitā viditvā lokapariyāyaṃ saṅkhāralokassa udayabbayaṃ ñatvā catusaccadhammaṃ ca aññāya kilesanibbānena nibbutā loke visattikaṃ tiṇṇā evaṃ na kubbanti, mayaṃ evarūpāni na kathemāti attho.

Paṭhaviyaṃ patiṭṭhahitvāti "ayuttaṃ amhehi kataṃ, akārakameva mayaṃ kārakavādena samudācarimhā"ti lajjamānā mahābrahmā viya bhagavati gāravaṃ paccupaṭṭhapetvā aggikkhandhaṃ viya bhagavantaṃ durāsadaṃ katvā namassamānā ākāsato otaritvā bhūmiyaṃ ṭhatvāti attho. Accayoti aparādho. No bhante accagamāti amhe atikkamma abhibhavitvā pavatto. Apasādetabbanti ghaṭayitabbaṃ. Tā kira devatā bhagavantaṃ kāyena vācāyāti dvīhipi ghaṭayiṃsu. Tathāgataṃ avanditvā ākāse patiṭṭhamānā kāyena ghaṭayiṃsu, kitavo cammaṃ āharitvā nānappakāraṃ asabbhivādaṃ vadamānā vācāya ghaṭayiṃsu. Tasmā apasādetabbaṃ amaññimhāti āhaṃsu. Paṭiggaṇhātūti khamatu. Āyatiṃ saṃvarāyāti anāgate saṃvaraṇatthāya, puna evarūpassa aparādhassa dosassa khalitassa akaraṇatthāya.

Sitaṃ pātvākāsīti aggadante dassento pahaṭṭhākāraṃ dassesi. Kasmā? Tā kira devatā na sabhāvena khamāpenti, lokiyamahājanañca sadevake loke aggapuggalaṃ tathāgatañca ekasadisaṃ karonti. Atha bhagavā "parato kathāya uppannāya buddhabalaṃ dīpetvā pacchā gamissāmī"ti sitaṃ pātvākāsi. Bhiyyoso mattāyāti