5. Ādittavagga

1. Ādittasuttavaṇṇanā

[41] Ādittavaggassa paṭhame jarāya maraṇena cāti desanāsīsametaṃ, rāgadīhi pana ekādasahi aggīhi loko ādittova. Dānenāti dānacetanāya. Dinnaṃ hoti sunībhatanti dānapuññacetanāhi dāyakasseva hoti gharasāmikassa viya nībhatabhaṇḍakaṃ, tenetaṃ vuttaṃ. Corā harantīti adinne bhoge corāpi haranti rājānopi, aggipi dahati, ṭhapitaṭṭhānepi nassanti. Antenāti maraṇena. Sarīraṃ sapariggahanti sarīrañceva corādīnaṃ vasena avinaṭṭhabhoge ca. Saggamupetīti vessantaramahārājādayo viya sagge nibbattatīti. Paṭhamaṃ.