@5 cha.Ma. cātu...., i. cātum.... 6 cha.Ma. pañño Añño paññavā na diṭṭhapubbo"ti ādīni vatvā vaṇṇakathāya antarāyaṃ karoti. Ānandatthero pana sāriputtattherassa sabhāgo, paṇītāni cīvarādīni labhitvā therassa deti, attano upaṭṭhākadārake pabbājetvā therassa santike upajjhaṃ gaṇhāpeti, sāriputtattheropi ānandattherassa tatheva karoti. Kiṃkāraṇā? aññamaññassa guṇesu pasīditvā. Ānandatthero hi "amhākaṃ jeṭṭhabhātiko ekaṃ asaṅkheyyaṃ satasahassañca kappaṃ pāramiyo pūretvā soḷasavidhaṃ paññaṃ paṭivijjhitvā dhammasenāpatiṭṭhāne ṭhito"ti therassa guṇesu pasīditvā ca theraṃ mamāyati. Sāriputtattheropi "sammāsambuddhassa mayā kattabbaṃ mukhodakadānādikiccaṃ sabbaṃ ānando karoti, ānandaṃ nissāyāhaṃ icchiticchitaṃ samāpattiṃ samāpajjituṃ labhāmī"ti tassāyasmato guṇesu pasīditvā taṃ mamāyati. Tasmā bhagavā sāriputtattherassa vaṇṇaṃ kathetukāmo ānandattherassa santike kathetuṃ āraddho.

Tattha tuyhaṃpīti sampiṇḍanatthe pikāro. Idaṃ vuttaṃ hoti:- ānanda sāriputtassa ācāro gocaro vihāro abhikkamo paṭikkamo ālokitavilokitaṃ sammiñjitapasāraṇaṃ mayhaṃ ruccati, asītimahātherānaṃ ruccati, sadevakassa lokassa ruccati, tuyhaṃpi ruccatīti.

Tato thero sāṭakantare laddhokāso balavamallo viya tuṭṭhamānaso hutvā "satthā mayhaṃpi sahāyassa vaṇṇaṃ kathāpetukāmo, labhissāmi no ajja dīpadhajabhūtaṃ mahājambuṃ vidhunanto viya balāhakantarato candaṃ nīharitvā dassento viya sāriputtattherassa vaṇṇaṃ kathetun"ti cintetvā paṭhamataraṃ tāva catūhi padehi puggalapalāpe haranto kassa hi nāma bhante abālassātiādimāha. Bālo hi bālatāya, duṭṭho dosatāya, muḷho mohena, vipallatthacitto ummattako cittavipallāsena vaṇṇaṃ "vaṇṇo"ti vā avaṇṇaṃ "avaṇṇo"ti vā "ayaṃ buddho,