Appicchoti santaguṇaniguhanatā, paccayapaṭiggahaṇe ca mattaññutā, etaṃ appicchalakkhaṇanti iminā lakkhaṇena samannāgato. Santuṭṭhoti catūsu paccayesu yathālābhasantoso yathābalasantoso yathāsāruppasantosoti imehi tīhi santosehi samannāgato. Pavivittoti kāyaviveko ca vivekaṭṭhakāyānaṃ nekkhammābhiratānaṃ, cittaviveko ca parisuddhacittānaṃ paramavodānapattānaṃ, upadhiviveko ca nirūpadhīnaṃ

Asaṃsaṭṭhogi dassana- saṃsaggo savanasaṃsaggo samullāpasaṃsaggo paribhogasaṃsaggo kāyasaṃsaggoti imehi pañcahi saṃsaggehi virahito. Ayañca pañcavidho saṃsaggo rājūhi rājamahāmattehi titthiyehi titthiyasāvakehi upāsakehi upāsikāhi bhikkhūhi bhikkhunīhīti aṭṭhahi puggalehi saddhiṃ jāyati, so sabbopi therassa natthīti asaṃsaṭṭho.

Āraddhaviriyoti paggahitaviriyo paripuṇṇaviriyo. Tattha āraddhaviriyo bhikkhu gamane uppannakilesassa ṭhānaṃ pāpuṇituṃ na deti, ṭhāne uppannassa nisajjaṃ, nisajjāya uppannassa sayanaṃ pāpuṇituṃ na deti, tasmiṃ tasmiṃ iriyāpathe uppannaṃ tattha tattheva niggaṇhāti. Thero pana catucattāḷīsavassāni mañce pīṭṭhiṃ na pasāresi. Taṃ sandhāya "āraddhaviriyo"ti āha. Vattāti odhunanavattā. Bhikkhūnaṃ ajjhācāraṃ disvā "ajja kathessāmi, sve kathessāmī"ti tiṇavatthāraṃ na karoti, tasmiṃ tasmiṃyeva ṭhāne ovadati anusāsatīti attho.

Vacanakkhamoti vacanaṃ khamati. Eko hi parassa ovādaṃ deti, sayaṃ pana aññena ovadiyamāno kujjhati. Thero pana parassapi ovādaṃ deti, sayaṃ ovadiyamānopi sirasā sampaṭicchati. Ekadivasaṃ kira sāriputtattheraṃ sattavassiko sāmaṇero "bhante sāriputta tumhākaṃ nivāsanakaṇṇo olambatī"ti āha. Thero kiñci avatvāva ekamantaṃ gantvā parimaṇḍalaṃ nivāsetvā āgamma "ettakaṃ vaṭṭati ācariyā"ti añjaliṃ paggayha aṭṭhāsi.