evaṃ pāpapuggalepi garahati, samaṇena nāma rāgavasikena dosamohavasikena na hotabbaṃ, uppanno rāgo doso moho pahātabbo"ti evaṃ pāpadhammepi garahatīti dvīhi kāraṇehi "pāpagarahī bhante āyasmā sāriputto"ti vadati.

Evaṃ āyasmatā ānandena soḷasahi padehi therassa yathābhūtaṃ vaṇṇappakāsane kate "kiṃ ānando attano piyasahāyassa vaṇṇaṃ kathetuṃ na labhati, kathetu kiṃ pana tena kathitaṃ tatheva hoti, kiṃ so sabbaññū"ti koci pāpapuggalo vattuṃ mā labhīti. Satthā taṃ vaṇṇabhaṇanaṃ akuppaṃ sabbaññūbhāsitaṃ karonto jinamuddikāya lañchanto evametantiādimāha.

Evaṃ tathāgatena ca ānandattherena ca mahāsāvakassa vaṇṇe kathiyamāne bhūmaṭṭhakā devatā uṭṭhahitvā eteheva soḷasahi padehi vaṇṇaṃ kathayiṃsu, tato ākāsaṭṭhakadevatā sītabalāhakā uṇhabalāhakā cātummahārājikāti yāva akaniṭṭhabrahmalokā devatā uṭṭhahitvā eteheva soḷasahi padehi vaṇṇaṃ kathayiṃsu. Etenupāyena ekacakkavāḷaṃ ādiṃ katvā dasasu cakkavāḷasahassesu devatā uṭṭhahitvā kathayiṃsu. Athāyasmato sāriputtassa saddhivihāriko susimo devaputto cintesi "ime devaputtā attano attano nakkhattakīḷaṃ pahāya tattha ṭhatvā mayhaṃ upajjhāyasseva vaṇṇaṃ kathenti, gacchāmi tathāgatassa santikaṃ, gantvā etadeva vaṇṇabhaṇanaṃ devatā bhāsitaṃ karomī"ti, so tathā akāsi. Taṃ dassetuṃ athakho susimo devaputtoti ādi vuttaṃ.