Viddheti dūribhūte. Deveti ākāse. Nabhaṃ abbhussakkamānoti ākāsaṃ abhilaṅghanto. Iminā taruṇasuriyabhāvo dassito. Soratoti soraccena samannāgato. Dantoti nibbisevano. Satthuvaṇṇabhatoti satthārā ābhatavaṇṇo. Satthā hi aṭṭhaparisamajjhe nisīditvā "sevatha bhikkhave sāriputtamoggallāne"ti ādinā nayena therassa vaṇṇaṃ āharati. Thero ābhatavaṇṇo nāma hoti. Kālaṃ kaṅkhatīti parinibbānakālaṃ pattheti. Khīṇāsavo hi neva maraṇaṃ abhinandati, na jīvitaṃ pattheti, divase vetanaṃ gantvā ṭhitapuriso viya kālaṃ pana pattheti, olokento tiṭṭhatīti attho. Tenāha:-

"nābhinandāmi maraṇaṃ nābhinandāmi jīvitaṃ.

Kālaṃ ca pāṭikaṅkhāmi nibbisaṃ bhatako yathā"ti. Navamaṃ.