@4 ka. pakuddhako 5 ka. pakuddho Samaṇadhamme koṭippattā. Na hi nūna teti te sappurisehi na dūre, teyeva loke sappurisāti vadati. Paccabhāsīti "ayaṃ ākoṭako imesaṃ nagganissirikānaṃ dasabalassa santike ṭhatvā vaṇṇaṃ kathetīti tesaṃ avaṇṇaṃ kathessāmī"ti paṭiabhāsīti.

Tattha sahā caritenāti saha caritamattena. Chavo sigāloti lāmako kāṇasigālo. Koṭṭhukoti tasseva vevacanaṃ. Saṅkassarācāroti āsaṅkitasamācāro. Na sataṃ sarikkhoti paṇḍitānaṃ sappurisānaṃ sadiso na hoti, kiṃ tvaṃ kāṇasigālasadiso titthiye sīhe karosīti.

Anvāvisitvāti "ayaṃ evarūpānaṃ satthārānaṃ avaṇṇaṃ katheti, teneva naṃ mukhena vaṇṇaṃ kathāpessāmī"ti cintetvā tassa sarīre anvāvisi adhimucci, evaṃ anvāvisitvā. Āyuttāti tapojigucchane yuttapayuttā. Pālayaṃ pavivekiyanti pavivekaṃ pālayantā. Te kira "nhāpitapavivekaṃ pālessāmā"ti sayaṃ kese luñcanti, "cīvarapavivekaṃ pālessāmā"ti naggā vicaranti, "piṇḍapātapavivekaṃ pālessāmā"ti sunakhā viya bhūmiyaṃ vā bhuñjanti hatthesu vā, "senāsanapavivekaṃ pālessāmā"ti kaṇṭakaseyyādīni kappenti. Rūpe niviṭṭhāti taṇhādiṭṭhīhi rūpe patiṭṭhitā. Devalokābhinandinoti devalokapatthanakā. Mātiyāti maccā, teva macce paralokatthāya sammāanusāsantīti vadati.