7. Atthakaraṇasuttavaṇṇanā

[118] Sattame kāmahetūti kāmamūlakaṃ. Kāmanidānanti kāmapaccayā. Kāmādhikaraṇanti kāmakāraṇā. Sabbāni hetāni aññamaññavevacanāneva. Bhadramukhoti sundaramukho. Ekadivasaṃ kira rājā atthakaraṇe nisīdi. Tattha paṭhamataraṃ lañcaṃ gahetvā nisinnā amaccā assāmike sāmike kariṃsu. Rājā taṃ ñatvā "mayhaṃ tāva paṭhavissarassa sammukhā cete evaṃ karonti, parammukhā kinnāma na karissanti, paññāyissati idāni viḍūḍabho senāpati sakena rajjena, kiṃ mayhaṃ evarūpehi lañcakhādakehi musāvādīhi saddhiṃ ekaṭṭhāne nisajjāyā"ti cintesi. Tasmā evamāha. Khippaṃva oḍḍitanti kuminaṃ viya oḍḍitaṃ. Yathā macchā oḍḍitaṃ kuminaṃ pavisantā na jānanti, evaṃ sattā kilesakāmena vatthukāmaṃ vītikkamantā na jānantīti attho. Sattamaṃ.