So sivikasālāyaṃ brāhmaṇe sannipātetvā tamatthaṃ ārocetvā "visuṃ visuṃ gantvā evaṃ vadathā"ti tayo vagge akāsi. Brāhmaṇā pavisitvā rājānaṃ sukhaseyyaṃ pucchiṃsu. Rājā purohitassa kathitaniyāmeneva kathetvā "kathaṃ sotthi bhaveyyā"ti pucchi. Mahābrāhmaṇā "sabbapañcapañcasataṃ yaññaṃ yajitvā etassa kammassa sotthi bhaveyya, evaṃ mahārāja ācariyā kathentī"ti āhaṃsu. Rājā tesaṃ sutvā anabhinanditvā apaṭikkositvā tuṇhī ahosi. Atha dutiyavaggabrāhmaṇāpi āgantvā tatheva kathesuṃ. Tathā tatiyavaggabrāhmaṇāpi. Atha rājā "yaññaṃ karontū"ti āṇāpesi. Tato paṭṭhāya brāhmaṇā usabhādayo pāṇe āharāpesuṃ, nagare mahāsaddo udapādi. Taṃ pavattiṃ ñatvā mallikā rājānaṃ tathāgatassa santikaṃ pesesi. So gantvā bhagavantaṃ vanditvā ekamantaṃ nisīdi. Atha naṃ bhagavā "handa kuto nu tvaṃ mahārāja āgacchasi divādivassā"ti āha. Rājā "ajja me bhante supinake cattāro saddā sutā, sohaṃ brāhmaṇe pucchiṃ, brāhmaṇā `bhāriko mahārāja supino, sabbapañcapañcasataṃ yaññaṃ yajitvā paṭikammaṃ karomā'ti āraddhā"ti āha. Kinti te mahārāja saddā sutāti. So yathāsutaṃ ārocesi. Atha naṃ bhagavā āha:- pubbe mahārāja imasmiṃyeva nagare cattāro seṭṭhiputtā paradārakā hutvā nandopanandāya lohakumbhiyā nibbattā saṭṭhīvassasahassamatthake ummujjiṃsu.

@4 Ma. supinakā 5 cha.Ma., i. bhāriyo 6 cha.Ma., i. paradārikā

@7 cha.Ma., i. uggacchiṃsu, Ma. uppajjiṃsu