Saṃvāsenāti saha vāsena. Sīlaṃ veditabbanti ayaṃ sussīlo vā dussīlo vāti saṃvasantena upasaṅkamantena jānitabbo. Tañca kho dīghena addhunā na ittaranti tañca sīlaṃ dīghena kālena veditabbaṃ, na ittarena. Dvīhatīhañhi saṃyatākāro ca saṃvutindriyākāro ca na sakkā dassetuṃ. Manasikarotāti tampi sīlamassa pariggahissāmīti manasikarontena paccavekkhanteneva sakkā jānituṃ, na ittarena. Paññavatāti tampi sappaññeneva paṇḍitena. Bālo hi manasikarontova jānituṃ na sakkoti.

Saṃvohārenāti kathanena.

"yo hi koci manussesu vohāraṃ upajīvati

evaṃ vāseṭṭha jānāhi vāṇijo so na brāhmaṇo"ti ettha hi byavahāro vohāro nāma. "cattāro ariyavohārā cattāro anariyavohārā"ti ettha cetanā. "saṅkhā samaññā paññattivohāro"ti ettha paññatti. "vohāramattena so vohareyyā"ti ettha kathāvohāro. Idhāpi esova adhippeto. Ekaccassa hi sammukhā kathā parammukhāya kathāya na sameti parammukhā kathā ca sammukhāya kathāya, tathā purimakathā pacchimakathāya,