@saṅgītisutta 12 abhi. saṅgaṇi. 34/1313/297 nikkhepakaṇḍa

@13 saṃ. sagā. 15/25/17 arahantasutta Pacchimakathā ca purimakathāya. So kathenteneva sakkā jānituṃ "asuci eso puggalo"ti. Sucisīlassa pana purimaṃ pacchimena, pacchimañca purimena sameti, sammukhā kathitaṃ parammukhā kathitena, parammukhā kathitañca sammukhā kathitena, tasmā kathentena sakkā sucibhāvo jānitunti pakāsento evamāha.

Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbagahaṇaṃ kattabbakiccaṃ apassanto andhakāraṃ gharaṃ paviṭṭho viya carati. Tenāha āpadāsu kho mahārāja thāmo veditabboti. Sākacchāyāti saṅkathāya. Duppaññassa hi kathā udake geṇḍuko viya upalavati, paññavato kathentassa paṭibhāṇaṃ anantaṃ hoti. Udakavipphanditeneva hi maccho khuddako vā mahanto vāti ñāyati. Ocarakāti heṭṭhā carakā. Carā hi pabbatamatthakena carantāpi heṭṭhā carakāva honti. Ocaritvāti avacaritvā vīmaṃsitvā, taṃ taṃ pavattiṃ ñatvāti attho. Rajojallanti rajañca jallañca. Vaṇṇarūpenāti vaṇṇasaṇṭhānena. Ittaradassanenāti lahukadassanena. Viyañjanenāti parikkhārabhaṇḍakena. Paṭirūpako mattikakuṇḍalovāti suvaṇṇakuṇḍalapaṭirūpako mattikakuṇḍalova. Lohaḍḍhamāsoti lohamāsako. Paṭhamaṃ.