5. Dutiyasaṅgāmasuttavaṇṇanā

[126] Pañcame abbhuyyāsīti parājaye garahappatto "ārāmaṃ gantvā bhikkhūnaṃ kathāsallāpaṃ suṇathā"ti rattibhāge buddharakkhitena nāma vuḍḍhapabbajitena dhammarakkhitassa vuḍḍhapabbajitassa "sace rājā imañca upāyaṃ katvā gaccheyya, puna jineyyā"ti vuttajayakāraṇaṃ sutvā abhiuyyāsi.

Yāvassa upakappatīti yāva tassa upakappati sayhaṃ hoti. Yadā caññeti yadā caññe. Vilumpantīti taṃ vilumpitvā ṭhitapuggalaṃ vilumpanti. Vilumpatīti vilumpiyati. Ṭhānañhi maññatīti "kāraṇan"ti hi maññati. Yadāti yasmiṃ kāle. Jetāraṃ labhate jayanti jayanto puggalo pacchā jetārampi labhati. Rosetāranti ghaṭetāraṃ. Rosakoti ghaṭako. Kammavivaṭṭenāti kammapariṇāmena, tassa vilumpanakammassa vipākadānena. So vilutto vilumpatīti so vilumpako vilumpiyati. Pañcamaṃ.