@8 cha.Ma. ayaṃ pāṭho na dissati 9 cha.Ma. attanā kattabbakiccakaro Pacchā vippaṭisārī ahosīti so kira aññesupi divasesu taṃ paccekasambuddhaṃ passati, dātumpanassa cittaṃ na uppajjati. Tasmiṃ pana divase ayaṃ padumavatideviyā tatiyaputto tagarasikhī paccekasambuddho gandhamādanapabbate phalasamāpattisukhena vītināmetvā pubbaṇhasamaye vuṭṭhāya anotattadahe mukhaṃ dhovitvā manosilātale nivāsetvā kāyabandhanaṃ bandhitvā pattacīvaramādāya abhiññāpādakaṃ catutthajjhānaṃ samāpajjitvā iddhiyā vehāsaṃ abbhuggantvā nagaradvāre oruyha cīvaraṃ pārupitvā pattamādāya nagaravāsīnaṃ nagaradvāresu sahassabhaṇḍikaṃ ṭhapento viya pāsādikehi abhikkantādīhi anupubbena seṭṭhino gharadvāraṃ sampatto. Taṃdivasañca seṭṭhī pātova uṭṭhāya paṇītabhojanaṃ bhuñjitvā gharadvārakoṭṭhake āsanaṃ paññāpetvā dantantarāni sodhento nisinno hoti. So paccekasambuddhaṃ disvā taṃdivasaṃ pāto bhutvā nisinnattā dānacittaṃ uppādetvā bhariyaṃ pakkosāpetvā "imassa samaṇassa piṇḍapātaṃ dehī"ti vatvā pakkāmi.

Seṭṭhibhariyā cintesi "mayā ettakena kālena imassa `dethā'ti vacanaṃ na sutapubbaṃ, dāpentopi ca ajja na yassa vā tassa vā dāpeti, vītarāgadosamohassa vantakilesassa ohitabhārassa paccekasambuddhassa dāpeti, yaṃ vā taṃ vā adatvā paṇītaṃ piṇḍapātaṃ dassāmī"ti gharā nikkhamma paccekasambuddhaṃ pañcapatiṭṭhitena vanditvā pattaṃ ādāya antonivesane paññattāsane nisīdāpetvā suparisuddhehi sālitaṇḍulehi bhattaṃ sampādetvā tadanurūpaṃ khādanīyabyañjanaṃ sūpeyyañca sallakkhetvā bahi gandhehi alaṅkaritvā paccekabuddhassa hatthesu patiṭṭhapetvā vandi. Paccekabuddho "aññesampi paccekabuddhānaṃ saṅgahaṃ karissāmī"ti aparibhuñkhitvāva anumodanaṃ katvā pakkāmi. Sopi kho seṭṭhī bāhirato āgacchanto paccekabuddhaṃ disvā mayaṃ "tumhākaṃ piṇḍapātaṃ dethā"ti vatvā pakkantā, apica kho laddhoti. Āma seṭṭhi laddhoti. "passāmī"ti gīvaṃ ukkhipitvā olokesi. Athassa piṇḍapātagandho uṭṭhahitvā nāsapuṭaṃ pahari. So cittaṃ saṃyametuṃ asakkonto pacchā vippaṭisārī ahosīti.