@* cha.Ma. issattasuttavaṇaṇanā Yuttaṃ nukho sayampi bhikkhācāranissitena paresaṃ bhikkhācāranissitānaṃ catunnaṃ paccayānaṃ antarāyaṃ kātuṃ, ayuttaṃ karoti ananucchavikan"ti. Sā kathā pattharamānā rājakulaṃ sampattā. Rājā sutvā cintesi "aṭṭhānametaṃ yaṃ tathāgato paresaṃ lābhantarāyaṃ kareyya, ete tathāgatassa alābhāya ayasāya parisakkanti. Sacāhaṃ idheva ṭhatvā `mā evaṃ avacuttha, na satthā evaṃ kathetī'ti vadeyyaṃ, esā kathā nijjhaggiṃ na gaccheyya, imassa mahājanassa sannipatitakāleyeva naṃ nijjhāpessāmī"ti ekaṃ chaṇadivasaṃ āgamento tuṇhī ahosi.

Aparena samayena mahāchaṇe sampatte "ayaṃ imassa kālo"ti nagare bheriṃ carāpesi:- "saddhā vā assaddhā vā sammādiṭṭhikā vā micchādiṭṭhikā vā geharakkhake dārake vā mātugāme vā ṭhapetvā avasesā ye vihāraṃ nāgacchanti, paññāsadaṇḍo"ti. Sayampi pātova nhātvā katapātarāso sabbābharaṇapaṭimaṇḍito mahatā balakāyena saddhiṃ vihāraṃ agamāsi. Gacchanto ca cintesi:- "bhagavā tumhehi kira mayhameva dānaṃ dātabbaṃ .pe. Na aññesaṃ sāvakānaṃ dinnaṃ mahapphalan'ti evaṃ pucchituṃ ayuttaṃ, pañhameva pucchissāmi, pañhaṃ kathento ca me bhagavā avasāne titthiyānaṃ vādaṃ bhajjissatī"ti. So pañhaṃ pucchanto kattha nukho bhante dānaṃ dātabbanti āha. Yatthāti yasmiṃ puggale cittaṃ pasīdati, tasmiṃ dātabbaṃ, tassa vā dātabbanti attho.

Evaṃ vutte rājā yehi manussehi titthiyānaṃ vacanaṃ ārocitaṃ, tepi olokesi. Te raññā olokitamattāva maṅkubhūtā adhomukhā pādaṅguṭṭhakena bhūmiṃ khanamānā aṭṭhaṃsu. Rājā "ekapadeneva bhante hatā titthiyā"ti mahājanaṃ sāvento mahāsaddena abhāsi. Evaṃ vacanaṃ bhāsitvā "bhagavā cittaṃ nāma nigaṇṭhācelakaparibbājakādīsu yattha katthaci pasīdati, kattha pana dinnaṃ mahapphalan"ti pucchi. Aññaṃ kho etanti "mahārāja aññaṃ tayā paṭhamaṃ pucchitaṃ, aññaṃ pacchā,