@4 cha.Ma.,i. baddhoti. evamuparipi 5 cha.Ma., i. divase divase Pariyosānaṃ. Sīlasamādhayo vā ādi, vipassanāmaggā majjhaṃ, phalanibbānāni pariyosānaṃ. Sīlasamādhivipassanā vā ādi, maggo majjhaṃ, phalanibbānāni pariyosānaṃ. Desanāya pana catuppadikāya gāthāya tāva paṭhamapado ādi. Dutiyatatiyā majjhaṃ, catuttho pariyosānaṃ. Pañcapadachappadānaṃ paṭhamapado ādi, avasānapado pariyosānaṃ, sesā majjhaṃ. Ekānusandhikasuttassa nidānaṃ ādi, "idamavocā"ti pariyosānaṃ, sesaṃ majjhaṃ. Anekaanusandhikassa majjhe bahūpi anusandhimeva nidānaṃ ādi, "idamavocā"ti pariyosānaṃ.

Sātthanti sātthakaṃ katvā desetha. Sabyañjananti byañjanehi ceva padehi ca paripūraṃ katvā desetha. Kevalaparipuṇṇanti sakalaparipuṇṇaṃ. Parisuddhanti nirūpakkilesaṃ. Brahmacariyanti sikkhattayasaṅgahasāsanabrahmacariyaṃ. Pakāsethāti āvikarotha.

Apparajakkhajātikāti paññācakkhumhi appakilesarajasabhāvā, dukūlasāṇiyā paṭicchannā viya catuppadikagāthāpariyosāne arahattappattasamatthā sattā santīti attho. Assavanatāti assavanatāya. Parihāyantīti alābhaparihāniyā dhammato parihāyanti. Senānigamoti paṭhamakappikānaṃ senāya niviṭṭhokāse patiṭṭhitagāmo, sujātāya vā pitu senānigamo. Tenupasaṅkamissāmīti nāhaṃ tumhe uyyojetvā pariveṇādīni kāretvā upaṭṭhākādīhi paricariyamāno viharissāmi, tiṇṇaṃ pana jaṭilānaṃ aḍḍhuḍḍhāni pāṭihāriyasahassāni dassetvā dhammameva desetuṃ upasaṅkamissāmi. Upasaṅkamīti "ayaṃ samaṇo gotamo mahāyuddhaṃ viya `mā ekena dve agamittha, dhammaṃ desethā'ti saṭṭhī jane uyyojeti, imasmiṃ pana ekasmiṃpi dhammaṃ desente mayhaṃ cittassa sātaṃ natthi, evaṃ bahūsu desentesu kuto bhavissati, paṭibāhāmi nan"ti cintetvā upasaṅkami. Pañcamaṃ.