3. Sakkalikasuttavaṇṇanā

[149] Tatiye mandiyā nu sīseti mandabhāvena momūhabhāvena. Udāhu kāveyyamattoti udāhu yathā kathitabbaṃ cintento tena kattabbakārena matto sayati, evaṃ sayasi. Sampacurāti bahavo. Kimidaṃ soppase vāti kasmā idaṃ soppaṃ soppasiyeva. Atthaṃ sameccāti atthaṃ samāgantvā pāpuṇitvā. Mayhaṃ hi asaṅgato nāma saṅgatavipannovāti attho natthi. Sallanti tikhiṇasattisallaṃ. Jaggaṃ na saṅkemīti yathā ekacco sīhapathādīsu jagganto saṅkati, tathā ahaṃ jaggantopi na saṅkāmi. Napi bhemi sottunti yathā ekacco sīhapathādīsuyeva supituṃpi bhāyati, evaṃ ahaṃ supituṃ na bhāyāmi. Nānutapanti māmanti yathā ācariyassa vā antevāsikassa vā aphāsuke jāte uddesaparipucchāya ṭhitattā antevāsiṃ rattindivā atikkamantā anupatanti, evaṃ maṃ nānutapanti. Na hi mayhaṃ kiñci apariniṭṭhitakammaṃ nāma atthi. Tenevāha "hāniṃ na passāmi kuhiñci loke"ti. Tatiyaṃ.