@4 cha.Ma. caraṇadivase 5 cha.Ma. chaṇapūvaṃ * cha.Ma. chaphassāyatanasutta....

Upasaṅkamīti amittavijayena viya tuṭṭho sakalagāme kaṭacchumattampi bhattaṃ alabhitvā gāmato nikkhamantaṃ bhagavantaṃ gāmiyamanussavesena upasaṅkami. Tathāhaṃ karissāmīti idaṃ yo musā bhāsati. Evaṃ kirassa ahosi "mayā evaṃ vutte puna pavisati, atha naṃ gāmadārakā `sakalagāme caritvā kaṭacchubhikkhaṃpi alabhitvā gāmato nikkhamma puna paviṭṭhosī'tiādīni vatvā upphaṇḍessantī"ti. Bhagavā pana "sacāyaṃ maṃ evaṃ viheṭhessati, muddhamasseva sattadhā phalessatī"ti tasmiṃ anukampāya apavisitvā gāthādvayamāha.

Tattha pasavīti janesi uppādesi. Āsajjāti āsādetvā ghaṭetvā. Na me pāpaṃ vipaccatīti mama pāpaṃ na vipaccati. Nipphalaṃ etanti kiṃ nu tvaṃ evaṃ maññasi, mā evaṃ maññasi, atthi tayā katassa pāpassa phalanti dīpeti. Kiñcananti maddituṃ samatthaṃ rāgakiñcanādikilesajātaṃ. Ābhassarā yathāti yathā ābhassarā devā sappītikajjhānena yāpentā pītibhakkhā nāma honti, evaṃ bhavissāmāti. Aṭṭhamaṃ.