5. Bhikkhunīyutta

1. Āḷavikāsuttavaṇṇanā

[162] Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedaṃ pattehi pañcahi corasatehi nivutthattā tato paṭṭhāya "andhavanan"ti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha ca vivekakāmā bhikkhū ca bhikkhuniyo ca gacchanti. Tasmā ayaṃpi āḷavikā vivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanaṭṭhena sattisūlasadisā. Khandhāsaṃ adhikuṭṭhanāti khandhā tesaṃ adhikuṭṭhanagaṇḍikā. Paṭhamaṃ.