6. Cālāsuttavaṇṇanā

[167] Chaṭṭhe ko nu tvaṃ idamādapayīti ko nu mandabuddhī bālo taṃ evaṃ gāhāpesi. Pariklesanti aññaṃpi nānappakāraṃ upaddavaṃ. Idāni yaṃ māro āha "ko nu tvaṃ idamādapayī"ti, taṃ maddantī "na maṃ andhabālo ādapesi, loke pana aggapuggalo satthā dhammaṃ desesī"ti dassetuṃ buddhotiādimāha. Tattha sacce nivesayīti paramatthasacce nibbāne nivesesi. Nirodhaṃ appajānantāti nirodhasaccaṃ ajānantā. Chaṭṭhaṃ.