@4 cha.Ma., i.saha kāyena 5 cha.Ma. dhuvādīni, i. dhuvādīti 6 cha.Ma., i. sakalaṃ

@7 cha.Ma. sahakāyā, i. panokāsā 8 cha.Ma., i. evamassa * pāli. bakasutta (mahācuḷa) Katvā tatiyaṃ jhānaṃ paṇītaṃ bhāvetvā subhakiṇhe brahmaloke catusaṭṭhikappaṃ āyuṃ gahetvā nibbatti. Tattha dutiyajjhānaṃ bhāvetvā ābhassare aṭṭhakappe āyuṃ gahetvā nibbatti. Tattha paṭhamajjhānaṃ bhāvetvā paṭhamajjhānabhūmiyaṃ kappāyuko hutvā nibbatti. So paṭhamakāle attanā katakammañca nibbattaṭṭhānañca aññāsi, kāle pana gacchante gacchante ubhayaṃ pammussitvā sassatadiṭṭhiṃ uppādesi.

Avijjāgatoti avijjāya gato añāṇasamannāgato añāṇī andhībhūto. Yatra hi nāmāti yo nāma. Vakkhatīti bhaṇati. "yatrā"ti nipātayogena pana anāgatavacanaṃ kataṃ.

Evaṃ vutte so brahmā yathā nāma magge coro dve tayo pahāre adhivāsento sahāye anācikkhitvāpi uttaripahāraṃ pahariyamāno "asuko ca asuko ca mayhaṃ sahāyo"ti ācikkhati, evameva bhagavatā santajjiyamāno satiṃ labhitvā "bhagavā mayhaṃ padānupadaṃ pekkhanto maṃ nippīḷitukāmo"ti bhīto attano sahāye ācikkhanto dvāsattatītiādimāha. Tassattho:- bho gotama mayaṃ dvāsattatijanā puññakammā tena puññakammena idha nibbattā, vasavattino sayaṃ aññesaṃ vase avattitvā pare attano vase vattema, jātiñca jarañca atītā, ayaṃ no vedehi gatattā "vedagū"ti saṅkhagatā bhagavā antimā brahmūpapatti. Asmābhijappanti janā anekāti anekajanā amhe abhijappanti. "ayaṃ kho bhavaṃ brahmā mahābrahmā abhibhū anabhibhūto aññadatthudasso vasavatti issaro kattā nimmitā seṭṭho sajjitā vasī pitā bhūtabhabyānan"ti evaṃ patthenti pihentīti.