9. *- tudubrahmasuttavaṇṇanā

[180] Navame ābādhikoti "sāsapamattīhi pīḷakāhī"tiādinā nayena anantarasutte āgatena ābādhena ābādhiko. Bāḷhagilānoti adhimattagilāno. Tudūti kokālikassa upajjhāyo tudutthero nāma anāgāmaphalaṃ patvā brahmaloke nibbatto. So bhummaṭṭhakadevatā ādiṃ katvā "ayuttaṃ kokālikena kataṃ aggasāvake antimavatthunā abbhācikkhantenā"ti paramparāya brahmalokasampattaṃ kokālikassa pāpakammaṃ sutvā "mā mayhaṃ passantassa varāko nassi, ovadissāmi naṃ theresu cittapasādatthāyā"ti āgantvā tassa purato aṭṭhāsi. Taṃ sandhāya vuttaṃ "tudupaccekabrahmā"ti. Pesalāti piyasīlā. Kosi tvaṃ āvusoti nipannakova kavarakkhīni ummiletvā evamāha. Passa yāvañca teti passa yattakaṃ tayā aparaddhaṃ, attano nalāte mahāgaṇḍaṃ apassanto sāsapamattāya pīḷakāya maṃ codetabbaṃ maññasīti āha.

Atha naṃ "adiṭṭhipatto ayaṃ varāko, gilaviso viya kassaci vacanaṃ na karissatī"ti ñatvā purisassa hītiādimāha. Tattha kudhārīti kudhārisadisā pharusā vācā. Chindatīti kusalamūlasaṅkhāte mūleyeva nikantati. Nindiyanti ninditabbaṃ dussīlapuggalaṃ. Pasaṃsatīti uttamatthe sambhāvetvā khīṇāsavoti vadati. Taṃ vā nindati yo pasaṃsiyoti yo vā pasaṃsitabbo khīṇāsavo, taṃ antimavatthunā codento "dussīlo ayan"ti vadati. Vicināti mukhena so kalinti so taṃ aparādhaṃ mukhena vicināti nāma. Kalinā tenāti tena aparādhena sukhaṃ na vindati. Nindiyapasaṃsāya hi pasaṃsiyanindāya ca samakova vipāko.