2. Dutiyavagga

1. Sanaṅkumārasuttavaṇṇanā

[182] Dutiyavaggassa paṭhame sappinītīreti sappinīnāmikāya nadiyā tīre. Sanaṅkumāroti so kira pañcasikhakumārakakāle jhānaṃ bhāvetvā brahmaloke nibbatto kumārakavaṇṇeneva vicarati, tena naṃ "kumāro"ti sañjānanti, porāṇakattā pana "sanaṅkumāro"ti vuccati. Janetasminti janitasmiṃ, pajāyāti attho. Ye gottapaṭisārinoti ye janetasmiṃ gottaṃ paṭisaranti, tesu loke gottapaṭisārīsu khattayo seṭṭho. Vijjācaraṇasampannoti bhayabheravasuttapariyāyena pubbenivāsādīhi vā tīhi, ambaṭṭhasuttapariyāyena vipassanāñāṇaṃ manomayiddhi cha abhiññāyoti imāhi vā aṭṭhahi vijjāhi, sīlesu paripūrakāritā indriyesu guttadvāratā bhojane mattaññutā jāgariyānuyogo satta saddhammā cattāri rūpāvacarajjhānānīti evaṃ paṇṇarasadhammabhedena caraṇena ca samannāgato. So seṭṭho devamānuseti so khīṇāsavabrāhmaṇo devesu ca manussesu ca seṭṭho uttamoti. Paṭhamaṃ.