Pucchitaṃyeva vatvā apucchitaṃ pacchā kiṃ na vuttanti ce? tassa Upakārabhāvato ca dhammasambandhasamatthabhāvato ca. Ayaṃ hi brāhmaṇo paññavā, micchādiṭṭhikule pana jātattā saddhārahitova, saddhārahito ca paññavā paresaṃ saddhāya attano avisaye appaṭipajjamāno visesaṃ nādhigacchati, kilesakālussiya- parāmaṭṭhāpi sampasādamattalakkhaṇāpi cassa dubbalā saddhā balavatiyā paññāya sahasā vattamānā atthasiddhiṃ na karoti hatthinā saddhiṃ ekadhure yutto goṇo viya. Itissa saddhā upakārakāti taṃ brāhmaṇaṃ saddhāya patiṭṭhāpentena pacchāpi vattabbo ayamattho desanākusalatāya pubbe vutto. Bījassa ca upakārakā vuṭṭhi, sā tadanantaraṃyeva vuccamānā samatthā hoti. Evaṃ dhammasambandhasamatthabhāvato pacchāpi vattabbo ayamattho, aññopi evarūpo īsāyottādi pubbe vuttoti veditabbo.

@4 cha.Ma. ayaṃ pāṭho na dissati 5 cha.Ma. upakārikā, evamuparipi 6 cha.Ma. añño ca

Tattha sampasādalakkhaṇā saddhā, okappanalakkhaṇā vā. Bījanti pañcavidhaṃ bījaṃ mūlabījaṃ khandhabījaṃ phalubījaṃ aggabījaṃ bījabījameva pañcamanti. Taṃ sabbampi viruhanaṭṭhena bījantveva saṅkhaṃ gacchati.