12. Vaṅgīsasuttavaṇṇanā

[220] Dvādasame āyasmāti piyavacanaṃ. Vaṅgīsoti tassa therassa nāmaṃ. So kira pubbe padumuttarakāle paṭibhāṇasampannasāvakaṃ disvā dānaṃ datvā patthanaṃ katvā kappasatasahassaṃ pāramiyo pūretvā amhākaṃ bhagavato kāle sakalajambūdīpe vādakāmatāya jambūsākhaṃ parikkhipitvā ekena paribbājakena saddhiṃ vādaṃ katvā vāde jayaparājayānubhāvena teneva paribbājakena saddhiṃ saṃvāsaṃ kappetvā vasamānāya ekissā paribbājikāya kucchimhi nibbatto vayaṃ āgamma mātito pañcavādasataṃ, pitito pañcāti vādasahassaṃ uggaṇhitvā vicarati. Ekaṃ ca vijjaṃ jānāti, yaṃ vijjaṃ parijappitvā matānaṃ sīsaṃ aṅguliyā paharitvā "asukaṭṭhāne nibbatto"ti jānāti. So anupubbena gāmanigamādīsu vicaranto pañcahi māṇavasatehi saddhiṃ sāvatthiṃ anuppatto nagaradvāre sālāyaṃ nisīdi.

@4-4 cha.Ma. mātito pañcavādasatāni, pitito pañcavādasatānīti 5 cha.Ma. nisīdati