@4 Sī., Ma., i. sāvetīti 5 Sī., i. avijjāvisadiddhena, cha.Ma. avijjāvisaviṭṭhena

@6 cha.Ma., i. ghaṭṭiyamānassa

Idānissa kāmesu ādīnavaṃ kathayantī aniccātiādimāha. Tattha asitanti taṇhādiṭṭhinissayena anissitaṃ. Kasmā pabbajitaṃ tapeti evarūpaṃ khīṇāsavaṃ divāsoppaṃ na tapati, tādisaṃ pana kasmā na tapessatīti vadati. Therasseva ca etaṃ vacanaṃ, tasmā ayamettha attho:- baddhesu muttaṃ asitaṃ mādisaṃ khīṇāsavaṃ pabbajitaṃ kasmā divāsoppaṃ tape, na tapatīti. Sesagāthāsupi eseva nayo. Devatāya hi vacanapakkhe "evarūpaṃ khīṇāsavaṃ pabbajitaṃ divāsoppaṃ na tapati, tādisaṃ pana kasmā tapessati, tapessatiyevā"ti attho. Therassa vacanapakkhe "evarūpaṃ mādisaṃ khīṇāsavaṃ pabbajitaṃ kasmā divāsoppaṃ tape, na tapatiyevā"ti attho. Ayaṃ panettha anuttānapadavaṇṇanā. Vinayāti vinayena. Samatikkamāti vaṭṭamūlikāya avijjāya samatikkamena. Taṃ ñāṇanti taṃ catusaccañāṇaṃ. Paramodātanti paramaparisuddhaṃ. Pabbajitanti evarūpena ñāṇena samannāgataṃ pabbajitaṃ. Vijjāyāti catutthamaggavijjāya. Āraddhavīriyanti paggahitaviriyaṃ paripuṇṇaviriyaṃ. Dutiyaṃ.