7. Appaṭividitasuttavaṇṇanā

[7] Sattame dhammāti catusaccadhammā. Appaṭividitāti ñāṇena appaṭividdhā. Paravādesūti dvāsaṭṭhidiṭṭhigatavādesu. Tehi ito paresaṃ titthiyānaṃ vādattā paravādā nāma. Nīyareti attano dhammatāyapi gacchanti, parenapi nīyanti. Tattha sayameva sassatādīni gaṇhantā gacchanti nāma, parassa vacanena tāni gaṇhantā nīyanti nāma. Kālo tesaṃ pabujjhitunti tesaṃ puggalānaṃ pabujjhituṃ ayaṃ kālo. Lokasmimhi buddho uppanno, dhammo desiyati, saṃgho

Sambuddhāti sammā hetunā kāraṇena buddhā. Cattāro hi buddhā sabbaññūbuddho paccekabuddho catusaccabuddho sutabuddhoti. Tattha samatiṃsa pāramiyo pūretvā sammāsambodhiṃ patto sabbaññūbuddho nāma. Kappasatasahassādhikāni dve asaṅkheyyāni pāramiyo pūretvā sayambhutaṃ patto paccekabuddho nāma. Avasesakhīṇāsavā catusaccabuddhā nāma. Bahussuto sutabuddho nāma. Imasmiṃ atthe tayopi purimā vaṭṭanti. Sammadaññāti sammā hetunā kāraṇena jānitvā. Caranti visame samanti visame vā lokasannivāse visame vā sattakāye visame vā kilesajāte samaṃ carantīti.

Appaṭividitasuttavaṇṇanā niṭṭhitā.