@4 cha.Ma., i. bhikkhāhāraṃ Udāhu no"ti āvajjamānā tassa vibbhamitukāmatāya nisinnabhāvaṃ ñatvā "mā heva kho me devatānaṃ antare lajjaṃ uppādeyya, gacchāmissa vibbhamane antarāyaṃ karomī"ti āgantvā sarīre adhimuccitvā gīvaṃ parivattetvā bhūmiyaṃ pātesi. So akkhīhi parivattehi kheḷena paggharantena bhūmiyaṃ vipphandati. Tena vuttaṃ "yakkhena gahito hotī"ti.

Abhāsīti upāsikā puttassa taṃ vippakāraṃ disvā vegenāgantvā puttaṃ āliṅgitvā ūrūsu nipajjāpesi. Sakalagāmavāsino āgantvā balikammādīni karonti. Upāsikā paridevamānā imā gāthāyo abhāsi. Pāṭihāriyapakkhañcāti manussā "aṭṭhamīuposathassa paccuggamanañca anuggamanañca karissāmā"ti sattamīnavamiyāpi uposathaṅgāni samādiyanti, cātuddasīpaṇṇarasīnaṃ paccuggamanānuggamanaṃ karontā terasiyāpi pāṭipadepi samādiyanti, "vassāvāsassa anuggamanaṃ karissāmā"ti dvinnaṃ pavāraṇānaṃ antare aḍḍhamāsaṃ nibaddhuposathikā bhavanti. Idaṃ sandhāya vuttaṃ "pāṭihāriyapakkhañcā"ti. Aṭṭhaṅgasusamāgatanti aṭṭhahaṅgehi suṭṭhu samāgataṃ, sampayuttanti attho. Brahmacariyanti seṭṭhacariyaṃ. Na tehi yakkhā kīḷantīti na te gahetvā yakkhā kīḷanti.

Puna cātuddasinti imāya gāthāya sāmaṇerassa kāye adhimuttā yakkhinī āha. Āvi vā yadi vā rahoti kassaci sammukhe vā parammukhe vā. Pamutyatthīti pamutti atthi. Uppaccāpīti uppatitvāpi. Sacepi sakuṇo viya uppatitvā palāyasi, tathāpi te mokkho natthīti vadati. Evañca pana vatvā sāmaṇeraṃ muñci. Sāmaṇero akkhīni ummilesi, mātā kese pakiriya assasantī passasantī rodati. So "amanussena gahitomhī"ti na jānāti. Olokento pana "ahaṃ pubbe pīṭhe nisinno, mātā me avidūre nisīditvā taṇḍule dhovati, idāni panamhi bhūmiyaṃ nisinno, mātāpi me assasantī passasantī rodati, sakalanagaravāsinopi sannipatitā, kiṃ nu kho etan"ti nipannakova mataṃ vā ammāti gāthamāha.