@3 cha.Ma., i.vasanaṭṭhānehi 4 cha.Ma., i.dhammakathaṃ 5 ka. pākāraparikkhipasamīpe

@6 cha.Ma., i......siṅghāṇikaṃ Cīvaramāhara, vighāsādānaṃ dehī"ti kathentassa saddo samantā dvādasahatthamattameva gaṇhati. Dhammaṃ desentassa sacepi cakkavāḷapariyantaṃ katvā parisā nisīdati, yathāparisaṃ gacchati, bahiparisāya ekaṅgulimattampi na nigacchati "mā akāraṇā madhurasaddo nassī"ti. Tatrāyaṃ yakkhinī bahiparisāya ṭhitā saddaṃ na suṇāti, dvārakoṭṭhake ṭhitāya panassā mahatiyā buddhavīthiyā abhimukhe ṭhitāya gandhakuṭi paññāyi. Sā nivāte dīpasikhā viya buddhagāravena hatthakukkuccādivirahitaṃ niccalaṃ parisaṃ disvā "nūna cettha kiñci bhaṇḍabhājanīyaṃ bhavissati, yato ahaṃ sappitelamadhuphāṇitādīsu kiñcideva pattato vā hatthato vā paggharantaṃ bhūmiyaṃ vā pana patitaṃ labhissāmī"ti antovihāraṃ pāvisi. Dvārakoṭṭhake avaruddhakānaṃ nivāraṇatthāya ṭhitā ārakkhadevatā yakkhiniyā upanissayaṃ disvā na nivāresi. Tassā saha parisāya ekībhāvagamanena madhurassaro chaviādīni chinditvā aṭṭhimiñjaṃ āhacca aṭṭhāsi. Taṃ dhammassavanatthāya niccalaṃ ṭhitaṃ purimanayeneva puttakā codayiṃsu. Sā "dhammassavanassa me antarāyaṃ karontī"ti puttake tuṇhī uttarike hohīti evaṃ tosesi.

Tattha yāvāti yāva dhammaṃ suṇāmi, tāva tuṇhī hothāti attho. Sabbaganthappamocananti nibbānaṃ āgamma sabbe ganthā pamuccanti, tasmā taṃ sabbaganthappamocananti vuccati. Ativelāti velātikkantā pamāṇātikkantā. Piyāyanāti magganā patthanā. Tato piyataranti yā ayaṃ asasa dhammassa magganā patthanā, idaṃ mayhaṃ tato piyataranti attho. Piyatarāti vā pāṭho. Pāṇinanti yathā pāṇīnaṃ dukkhā moceti. Ke mocetīti. Pāṇinanti āharitvā vattabbaṃ. Yaṃ dhammaṃ abhisambudhanti yaṃ dhammaṃ bhagavā abhisambuddho. Tuṇhībhūtāyamuttarāti na kevalaṃ ahaṃ, ayaṃ me bhagiṇī uttarāpi tuṇhībhūtāti vadati. Saddhammassa anaññāyāti amma mayaṃ pubbepi imaṃ saddhammameva ajānitvā idāni idaṃ khuppipāsādidukkhaṃ anubhavantā dukkhaṃ carāmase dukkhaṃ viharāma.