@6 cha.Ma., i. jānāpeti 7 i. lahuṃ vikkiṇīyati vikkiṇāti Pakkamati. Anāthapiṇḍikopi tatheva karoti. Svāyaṃ tadāpi teneva karaṇīyena agamāsi. Taṃ sandhāyetaṃ vuttaṃ.

Taṃdivasaṃ pana rājagahaseṭṭhī yojanamatte ṭhitena anāthapiṇḍikena āgatabhāvajānanatthaṃ pesitaṃ paṇṇaṃ na suṇi. Dhammassavanatthāya vihāraṃ agamāsi. So dhammakathaṃ sutvā svātanāya buddhappamukhaṃ bhikkhusaṃghaṃ nimantetvā attano ghare uddhanakhanāpanadāruphālanādīni kāresi. Anāthapiṇḍikopi "idāni mayhaṃ paccuggamanaṃ karissati, idāni karissatī"ti gharadvārepi paccuggamanaṃ alabhitvā anto gharaṃ paviṭṭho. Paṭisanthāraṃpi na bahuṃ alattha. "kiṃ mahāseṭṭhī kuladārakarūpānaṃ. Nasi magge kilamanto"ti ettakova paṭisanthāro ahosi, so tassa mahābyāpāraṃ disvā "kinnu te gahapati āvāho vā bhavissatī"ti khandhake āgatanayena kathaṃ pavattetvā tassa mukhato buddhasaddaṃ sutvā pañcavaṇṇaṃ pītiṃ paṭilabhi. Sā tassa sīse uṭṭhahitvā yāva pādapiṭṭhiyā, pādapiṭṭhiyā uṭṭhāya yāva sīsā gacchati, ubhato uṭṭhāya osarati, majjhe uṭṭhāya ubhato gacchati. So pītiyā nirantaraṃ phuṭṭho "buddhoti tvaṃ gahapati vadasi, buddhotāhaṃ gahapati vadāmī"ti evaṃ tikkhattuṃ pucchitvā "ghosopi kho eso dullabho lokasmiṃ yadidaṃ buddho"ti āha. Idaṃ sandhāya vuttaṃ "assosi kho anāthapiṇḍiko gahapati buddho kira loke uppanno"ti.

Etadahosi akālo kho ajjāti so taṃ seṭṭhiṃ pucchi "kuhiṃ gahapati satthā viharatī"ti. Athassa so "buddhā nāma durāsadā āsīvisasadisā honti, satthā sīvathikāyaṃ vasati, na sakkā tattha tumhādisehi imāya velāya gantun"ti ācikkhi. Athassa etaṃ ahosi. Buddhagatāya satiyā nipajjīti taṃdivasaṃ kirassa bhaṇḍasakaṭesu vā upaṭṭhākesu vā cittampi na uppajji, sāyamāsaṃpi na akāsi, sattabhūmikaṃ pana pāsādaṃ āruyha supaññattālaṅkatavarasayane "buddho buddho"ti sajjhāyaṃ karontova nipajjitvā niddaṃ okkami, tena vuttaṃ "buddhagatāya satiyā nipajjī"ti.