9. Paṭhamasukkāsuttavaṇṇanā

[243] Navame rathikāya rathikanti ekarathikaṃ gahetvā tato aparaṃ gacchanto rathikāya rathikaṃ upasaṅkamanto nāma ahosi. Siṅghāṭakepi eseva nayo. Ettha ca rathikāti racchā. Siṅghāṭakanti catukkaṃ. Kimme katāti kiṃ me katā, kiṃ karontīti attho. Madhupītāva seyareti gandhamadhupānapītā viya sayanti. Gandhamadhupānapīto kira sīsaṃ ukkhipituṃ na sakkoti, asaññī hutvā sayateva. Tasmā evamāha.

Tañca pana appaṭivānīyanti tañca pana dhammaṃ appaṭivānīyaṃ deseti. Bāhirakañhi sumadhuraṃpi bhojanaṃ punappunaṃ bhuñjantassa na ruccati, "apanetha, kiṃ iminā"ti paṭivānetabbaṃ apanetabbaṃ hoti, na evamayaṃ dhammo. Imaṃ hi dhammaṃ paṇḍitā vassasataṃpi vassasahassaṃpi suṇantā tittiṃ na gacchanti. Tenāha "appaṭivānīyanti. Asecanakamojavan"ti anāsittakaṃ ojavantaṃ. Yathā hi bāhirāni asambhinnapāyāsādīnipi sappimadhusakkharāhi āsittāni yojitāneva madhurāni ojavantāni honti, na evamayaṃ dhammo. Ayaṃ hi attanova dhammatāya madhuro ceva ojavā ca, na aññena upasitto. Tenāha "asecanakamojavan"ti.