11. Sakkasaṃyutta

1. Paṭhamavagga

1. Suvīrasuttavaṇṇanā

[247] Sakkasaṃyuttassa paṭhame abhiyaṃsūti kadā abhiyaṃsu ? yadā balavanto ahesuṃ, tadā tatrāyaṃ anupubbīkathā:- sakko kira magadharaṭṭhe acalagāmake magho nāma māṇavo hutvā tettiṃsa purise gahetvā kalyāṇakammaṃ karonto satta vattapadāni pūretvā tattha kālakato devaloke nibbatti. Taṃ balavakammānubhāvena saparisaṃ sesadevatā dasahi ṭhānehi adhigaṇhantaṃ disvā "āgantukadevaputtā āgatā"ti nevāsikā gandhapānaṃ sajjayiṃsu. Sakko sakaparisāya saññaṃ adāsi "mārisā mā gandhapānaṃ pivittha, pivanākāramattameva dassethā"ti. Te tathā akaṃsu. Nevāsikadevaputtā suvaṇṇasarakehi upanītaṃ gandhapānaṃ yāvadatthaṃ pivitvā mattā tattha tattha suvaṇṇapaṭhaviyaṃ patitvā sayiṃsu. Sakko "gaṇhatha puttamatāya putte"ti te pādesu gahetvā sinerupāde khipāpesi. Sakkassa puññatejena tadanuvattakāpi sabbe tattheva patiṃsu. Te sineruvemajjhakāle saññaṃ labhitvā "tātā na suraṃ pivimhā"ti āhaṃsu. Tato paṭṭhāya asurā nāma jātā. Atha nesaṃ kammapaccayautusamuṭṭhānaṃ sinerussa heṭṭhimatale dasayojanasahassamattaṃ asurabhavanaṃ nibbatti. Sakko tesaṃ nivattitvā anāgamanatthāya ārakkhaṃ ṭhapesi, yaṃ sandhāya vuttaṃ:-