Nandanavaneti ettha taṃ vanaṃ paviṭṭhe paviṭṭhe nandayati tosetīti nandanaṃ. Pañcasu hi maraṇanimittesu uppannesu "sampattiṃ pahāya cavissāmā"ti paridevamānā devatā sakko devānamindo "mā paridevittha, abhijjanadhammā nāma saṅkhārā natthī"ti ovaditvā tattha pavesāpeti. Tāsaṃ aññāhi devatāhi bāhāsu gahetvā pavesitānaṃpi tassa sampattiṃ disvāva maraṇasoko vūpasamati, pītipāmojjameva uppajjati. Atha tasmiṃ kīḷamānāeva uṇhasantatto himapiṇḍo viya vilīyanti, vātāpahatadīpasikhā viya pavijjhāyantīti. Evaṃ yaṅkiñci anto paviṭṭhaṃ nandayati tosetiyevāti nandanaṃ, tasmiṃ nandane. Accharāsaṅghaparivutāti accharāti devadhītānaṃ nāmamaṃ, tāsaṃ samūhena parivutā.

Dibbehīti devaloke nibbattehi. Pañcahi kāmaguṇehīti manāpapiyarūpasaddagandha- rasaphoṭṭhabbasaṅkhātehi pañcahi kāmabandhanehi kāmakoṭṭhāsehi vā. Samappitāti upetā. Itaraṃ tasseva vevacanaṃ. Paricāriyamānāti ramayamānā, tesu tesu vā rūpādīsu indriyāni sañcārayamānā. Tāyaṃ velāyanti tasmiṃ paricāraṇakāle. So panassa devaputtassa adhunābhinibbattakālo veditabbo. Tassa hi paṭisandhikkhaṇeyeva rattasuvaṇṇakkhandho viya virocayamāno tigāvutapmāṇo attabhāvo nibbatti. So dibbavatthanivattho dibbālaṅkārapaṭimaṇḍito dibbamālāvilepanadharo dibbehi candanacuṇṇehi samavikiriyamāno dibbehi pañcahi kāmaguṇehi ophuto niphuto pariyonaddho lobhābhibhūto hutvā lobhanissaraṇaṃ nibbānaṃ apassanto āsabhiṃ vācaṃ bhāsanto viya mahāsaddena "na te sukhaṃ pajānantī"ti imaṃ gāthaṃ bhāsamāno nandanavane vicari. Tena vuttaṃ "tāyaṃ velāyaṃ imaṃ gāthaṃ abhāsī"ti.

@4 cha.Ma., i. paricārayamānāti ramamānā 5 Sī., i. sammāvikiriyamāno, cha.Ma. samaṃ