3. Sambarimāyāsuttavaṇṇanā

[269] Tatiye ābādhikoti isigaṇena abhisapakāle uppannābādhena ābādhiko. Vācehisi manti sace maṃ sambarimāyaṃ vācehisi, evamahantaṃ tikicchissāmīti vadati. Mā kho tuvaṃ mārisa vācesīti vināpi tāva sambarimāyaṃ sakko amhe bādhati, yadi pana taṃ jānissati, naṭṭhā mayaṃ, mā attano ekakassa atthāya amhe nāsetīti vatvā nivārayiṃsu. Sambarova sataṃ samanti yathā sambaro asurindo māyāvī māyaṃ payojetvā vassasataṃ niraye pakko, evaṃ paccati. Tumhe ca dhammikā, alaṃ vo māyāyāti vadati. Kiṃ pana sakko tassa kodhaṃ tikicchituṃ sakkaṇeyyāti. Āma sakkuṇeyya. Kathaṃ? tadā kira so isigaṇo dharatiyeva, tasmā naṃ isīnaṃ santikaṃ netvā khamāpeyya, evamassa phāsu bhaveyya. Tena pana vañcitattā tathā akatvā pakkantova. Tatiyaṃ.